Σην τσ̌έπη μ’ λεφτοκάρυ͜α

Αέτσ’ ας εθαρρούνε,
ζενγκίν εμέν να λένε
Άλλο η λογαρία μ’
κι ατείν’ τιδέν ’κ’ εξέρ’νε

Σην τσ̌έπη μ’ λεφτοκάρυ͜α,
θαρρούν έχω παράδες
Η ζήση μ’ με τα δράμι͜α
και με τα μουταράδες

Τ’ έμορφα καντουρεύω
και φεύω ας σα πελιάδες
Τρώνε και νοστιμεύκουν
κορτσόπα και νυφάδες

Σην τσ̌έπη μ’ λεφτοκάρυ͜α,
θαρρούν έχω παράδες
Τον χρόνον γυροκλώσκουμ’
με ποία μουταράδες;

Γλυκύν φίλεμαν παίρω
ντο δίγω τα καντζία
Γουρπάν’ και σα κορτσόπα
ντο είναι μερακλία

Σην τσ̌έπη μ’ λεφτοκάρυ͜α,
θαρρούν έχω παράδες
Η ζήση μ’ με τα δράμι͜α
και με τα μουταράδες

Αρ’ αέτσ’ τα κορτσόπα
με τα μουράτι͜α ζούνε
και όθεν καικά στέκω
τα τσ̌έπι͜ας ι-μ’ τερούνε

Σην τσ̌έπη μ’ λεφτοκάρυ͜α,
θαρρούν έχω παράδες
Η ζήση μ’ με τα δράμι͜α
και με τα μουταράδες
Τον χρόνον γυροκλώσκουμ’
με ποία μουταράδες;