Εγγονόπο μ’, αγγελούδ’

Εγγονόπο μ’, αγγελούδ’,
έμορφον είσαι λουλούδ’
Εγώ διπλά -ν- αγαπώ σε,
άμον το παιδί μ’ πονώ σε

Τη παιδί’ μ’ είσαι μωρόν,
είσαι τ’ εμόν γιατρικόν
Με την ψ̌η μ’ είσαι δεμένον,
σο αίμα μ’ απέσ’ γραμμένον

Πάππος είμαι, αγαπώ σε,
το ψ̌όπο μ’ εγώ δίγω σε
Ώραν αν ’κ’ ελέπω σε,
τηλέφωνον θα παίρω σε

Έρχομαι ν’ ευρήκω σε,
σην εγκάλια μ’ παίρω σε
Πουλόπο μ’, λασ̌κίζω σε,
ήντι͜αν έχω δίγω σε

Αχ! κρατώ σε απάν’ σ’ ωμί μ’,
πουλί μ’, δί’ς με δύναμην
Ας σα μαλλία κρατείς με,
εσύ όπως θέλτς ευτάς με

Το χ̌έρι σ’ όντες κρατώ,
πουλί μ’, ση γην ’κι πατώ
Φτερά δί’ς με και πετώ
μόνον μετ’ εσέν γελώ