Μ’ ανεσπάλεις καμίαν

Η μάνα σ’ ντ’ εγέννεσε σε
σο κουνίν ντ’ εκούνιξε σε
Ατέ ντ’ εβυζάλιξέ σε
Αχ! μ’ ανεσπάλεις καμίαν

Εσύ τη μάνα σ’, τον κύρη σ’,
τον αδελφό σ’, την αδελφή σ’
Απ’ όθεν έρθεν το σόι σ’
Αχ! μ’ ανεσπάλεις καμίαν

Έσουν μικρός, ετράνυνες
Έσουν κοντός, εμάκρυνες
Με τ’ ομματόπα σ’ ντο είδες
Αχ! μ’ ανεσπάλεις καμίαν

Με τ’ ωτία ατά ντ’ έκουσες
Με το στόμα σ’ ντ’ έφαες
Ατό την γλώσσαν ντ’ έμαθες
Αχ! μ’ ανεσπάλεις καμίαν

Νέος έσουν κι εγέρασες
τα ημέρας ντ’ εδέβαξες
Τα χώματα ντ’ επάτεσες
Αχ! μ’ ανεσπάλεις καμίαν