Τρυγόνι μ’, τρυγόνα μ’

Εσύ αρ’ τ’ εμόν το πουλίν
[τρυγόνι μ’, τρυγόνα μ’]
αρ’ τ’ εμόν η τρυγόνα
[ωφ, ωφ, ωφ αμάν]
Τ’ εμόν την ψ̌ην εσύ θα παίρτς,
[τρυγόνι μ’, τρυγόνα μ’]
το μαχ̌αίρι σ’ ακόνα
[ωφ, ωφ, ωφ αμάν]

Μάνα, τέρεν πως χορεύω,
και τ’ αντζόπα μ’ άν’ ’κι σ’κώνω
Και τη γην κατατρυπαίνω
και τη σ̌κύλ’ το γιον ’κι παίρω

Τ’ εμόν η ψ̌η κι ο θάνατον,
[τρυγόνι μ’, τρυγόνα μ’]
είναι σ’ εσά τα χ̌έρι͜α
[ωφ, ωφ, ωφ αμάν]
Αν θέλτς με το μέλ’ έπαρ’ ’το,
[τρυγόνι μ’, τρυγόνα μ’]
αν θέλτς με τα μαχ̌αίρι͜α
[ωφ, ωφ, ωφ αμάν]

Τέρεν, μάνα, πως χορεύω,
και τ’ αντζία μ’/αντζόπα μ’ άν’ ’κι παίρω
Και τη γην κατατρυπαίνω
και τη σ̌κύλ’ το γιον ’κι παίρω

♫

Με το να είμαι ορφανός,
[τσ̌άνουμ, γιαρ]
με το να ’κ’ έχω βίον [λέω]
Εσέν θα πεσλεεύω σε
[τσ̌άνουμ, γιαρ]
ας σον κύρη σ’ καλλίον [λέω]

Τσ̌άνουμ, τσ̌άνουμ, νε κορτσόπον, [λέω]
κατήβα σο πεγαδόπον [λέω]
Φέρον με κρύον νερόπον [λέω]
με το τσ̌αμουρένι͜ον το τεστόπον [λέω]
για τ’ εμόν το χατιρόπον [λέω]

Με το να είμαι ορφανός,
[τσ̌άνουμ, γιαρ]
με το να ’κ’ έχω μάναν [λέω]
Εσέν θα πεσλεεύω σε
[τσ̌άνουμ, γιαρ]
με τη πουλί’ το γάλα [λέω]

Τσ̌άνουμ, τσ̌άνουμ, νε κορτσόπον, [λέω]
κατήβα σο πεγαδόπον [λέω]
Φέρον με κρύον νερόπον [λέω]
με το τσ̌αμουρένι͜ον το τεστόπον [λέω]
για τ’ εμόν το χατιρόπον [λέω]