Τα κορτσόπα παλαλών’νε με

Αχ! Τα έμορφα κορτσόπα
όντες ’λέπ’ ατα
παλαλών’νε τ’ ομματόπα μ’,
να λελεύ’ ατα!
Να φιλώ -γ- ατα ’κι αφήν’νε
και σκοτών’νε με
Αχ! Τα έμορφα κορτσόπα
παλαλών’νε με

Αχ! Να είναι ευλοημένα,
όλι͜α θέλ’ ατα
Να ’πορώ σο σπίτι μ’ όλα
αχ! να παίρ’ ατα
Όσον λένε με «’κι θέλω»
φαρμακών’νε με
Αχ! Τα έμορφα κορτσόπα
παλαλών’νε με

Έχω σεβνταλίν καρδία,
ντό θα ’ίνουμαι;
Αφού έμορφα ελέπω
και ζαλίουμαι
Η καρδία μ’ και τ’ ομμάτι͜α μ’
θα σκοτών’νε με
Όσα ’κ’ επορώ να παίρω
φαρμακών’νε με
Αχ! Τα έμορφα κορτσόπα
παλαλών’νε με

Αχ! Τα έμορφα κορτσόπα
όντες ’λέπ’ ατα
Και το αίμα μ’ παίρ’ φωτίαν,
αχ! να λελεύ’ ατα!
Έναν τέρεμαν σ’ ομμάτι͜α μ’
και θαμπών’νε με
Αχ! Τα έμορφα κορτσόπα
παλαλών’νε με