Τερώ τα δεντροκέφαλα

Η θάλασσα φουρτούνα έτον
[γιαβρί μ’, πουλί μ’]
[και -ν-] εγώ κολύμπ’ εντούνα [γιαρ]
[Αμάν τα γιάβρουμ]
εγώ κολύμπ’ εντούνα [νέι]
Τρί’ ώρας ετσεκλέσ̌ευα
[γιαβρί μ’, πουλί μ’]
[και] την ψ̌η μ’ ’κ’ επαρεδούν’να
[Αμάν τα γιάβρουμ]
την ψ̌η μ’ ’κ’ επαρεδούν’να [νέι]

Τερώ τον ουρανόν γελώ,
[γιαβρί μ’, πουλί μ’]
[και] τη μαύρη γην και κλαίω [γιαρ]
[Αμάν τα γιάβρουμ]
τη μαύρη γην και κλαίω [νέι]
Τερώ τα δεντροκέφαλα
[γιαβρί μ’, πουλί μ’]
[και] παρηγορίαν παίρω [γιαρ]
[Αμάν τα γιάβρουμ]
παρηγορίαν παίρω [νέι]

Η καρδία μ’ έν’ γεραλίν
[γιαβρί μ’, πουλί μ’]
[και -ν-] αν κλαίω θα ματούται [γιαρ]
[Αμάν τα γιάβρουμ]
αν κλαίω θα ματούται [νέι]
Άμον τη λάμπας το γυαλίν
[γιαβρί μ’, πουλί μ’]
[και -ν-] απάν’ να κρού’ς τσακούται [γιαρ]
[Αμάν τα γιάβρουμ]
απάν’ να κρού’ς τσακούται [νέι]