Ποίος εμέναν τον καρίπ’

Αν αποθάνω σα μακρά
ποίος θα σαβανίζ’ με; [γιαρ]
Ποίος θα ’κχ̌ύν’ τα δα̤κρόπα τ’
εμέν πη ’κ’ εγνωρίζ’ με [γιαρ]

Ποίος εμέναν τον καρίπ’
τα δά̤κρα̤ τουν θα ’κχ̌ύν’νε [γιαρ]
Αν αποθάνω σο ταφί μ’
κερίν ποίος θ’ αφτύν’ με; -ν [γιαρ]

Μέρ’ κέσ’ θα ’φτάνε το ταφί μ’
να βάλ’νε το κορμόπο μ’; [γιαρ]
Είνας μάνα πη καίεται
θ’ αφτύν’ το καντηλόπο μ’ [γιαρ]

Τ’ ορμάνι͜α θα μοιρολογούν,
τα πουλόπα θα κλαίνε [γιαρ]
Ντ’ εδέβαν σο κιφαλόπο μ’
θα κάθουνταν και λένε [γιαρ]