Πατέρα, πάντα έλεες

Πατέρα, εσύ ετράνυνες
με πόνον τα παιδία σ’ [γιαρ]
Εφέκανε σε κι έφυγαν
(κι) εκάεν η καρδία σ’ [γιαρ]

Πατέρα, πάντα έλεες
«Γιαβρί μ’, μη πας σα ξένα [γιαρ]
Πώς θα αφήντς τη μανίτσα σ’,
τον γέρον τον πατέρα σ’;» [γιαρ]

Πατέρα, ’κι ανασπάλλ’ ατα
τ’ εσά τα τραγωδίας [γιαρ]
Ετραγώδ’νες και -ν- έλεες
«παιδί μ’, να έ͜εις την υεία σ’» [γιαρ]

Πατέρα, έρθα σ’ οσπιτόπο σ’,
τα πόρτας κλειδωμένα [γιαρ]
Ολόερα σην αύλι͜α σου
χορτάρι͜α φυτρωμένα [γιαρ]

Πατέρα, έρθα σο ταφί σ’
ν’ άφτω έναν κερόπον [γιαρ]
Δύο λόγια -ν- ας έλεες
να ησυχάζ’ το ψ̌όπο μ’ [γιαρ]