Αγαπώ σε, αγαπώ σε

Αγαπώ σε, αγαπώ σε,
εσέν αγαπώ
Ση ζωή μ’ εσέν μοναχά
σην καρδι͜ά μ’ κρατώ

Αγαπώ το τέρεμα σ’,
αγαπώ τ’ ομμάτι͜α σ’
Αγαπώ την καλατσ̌ή σ’,
τα στομόχ̌ειλα σ’

Όλια τ’ εσά αγαπώ
ήντι͜αν να ευτάς
Όσα αραεύω δί’ς με,
’δέν ’κι ψαλαφάς

Αγαπώ σε, αγαπώ σε,
εσέν αγαπώ
Τερώ τη φωτογραφία σ’
και παραμιλώ

Αγαπώ σε, αγαπώ σε,
εσέν αγαπώ
Κι απ’ εσέν μακρά, γιαβρόπο μ’,
’κ’ επορώ να ζω

Αγαπώ τα λώματα σ’
και ήντι͜αν φορείς
Αγαπώ τα ποδαρέας
όθεν κέσ’ πατείς

Αγαπώ σε όντες πίντς
και -ν- όντες μεθάς
Αγαπώ σε όντες κλαις
και -ν- όντες γελάς

Αγαπώ σε, αγαπώ σε,
εσέν αγαπώ
Τερώ τη φωτογραφία σ’
και παραμιλώ

Αγαπώ σε, αγαπώ σε,
εσέν αγαπώ
Όντες θέλω να φιλώ σε,
γιάβρι μ’, ’κ’ επορώ
Κι όντες θέλω να φιλώ σε
γιάτι ’κ’ επορώ;

Εσύ αλλού κάθεσαι
κι εγώ αλλού μένω
Πότε θα ελέπω σε
την ώραν περ’μένω

Όντες ’κ’ έχω σε σο γιάνι μ’,
αραεύω σε
Και το ψ̌όπο μ’ τυραννίζω
ντο ’κ’ ελέπω σε

Αγαπώ σε, αγαπώ σε,
εσέν αγαπώ
Φιλώ τη φωτογραφία σ’
και παραμιλώ