Θα πάω σ’ άγρι͜α σπήλαια

Θα πάω σ’ άγρι͜α σπήλαια [κοντόχρονον]
θα ’ίνουμ’ ασ̌κητής -ι [έλα -ν- έλα]
Θ’ απομακρύνω απ’ εσέν [κοντόχρονον]
να ησυχάζ’ η ψ̌η σ’ -ι [έλα -ν- έλα]

Τα χ̌ερόπα μ’ επάγωσαν [κοντόχρονον]
σ’ αποψιζ’νόν τη δείσαν [έλα -ν- έλα]
Να εφήν’να ’τα σο ψ̌όπο σου [κοντόχρονον]
ολίγον να/και ’χουλείσαν [έλα -ν- έλα]

Έκιτι, παλαία καρούς [κοντόχρονον]
ε! παλαία ζαμάνια [έλα -ν- έλα]
Αρ’ εκείμ’ σ’ εγκαλιόπο σου, [κοντόχρονον]
εδίν’νες με τερμάνια [έλα -ν- έλα]

Ο ουρανόν αστράφτ’ βροντά [κοντόχρονον]
και παραχαμελώνει [έλα -ν- έλα]
Τη Σάντας τα ψηλά ραχ̌ιά [κοντόχρονον]
ιεύ’ α̤τα το χ̌ι͜όνι [έλα -ν- έλα]