Αρνόπο μ’, έκοψα τ’ ομούτ’

Αρνόπο μ’, έκοψα τ’ ομούτ’,
οφέτος θ’ αποθάνω 
[γιαβρί μ’, πουλί μ’ / νέι]
’Κι κλαίω τα νεότητα μ’,
κλαίω εσέν ντο χάνω 
[γιαβρί μ’, πουλί μ’/γιαρ/νέι]

Χαπάρ’ ο Χάρον έστειλεν·
θα έρ’ται παίρ’ το ψ̌όπο μ’ 
[γιαβρί μ’, πουλί μ’/γιαρ]
Τα ώρας ι-μ’ εσούμωσαν
για ρούξον σ’ εγκαλιόπο μ’ 
[γιαβρί μ’, πουλί μ’/γιαρ]

Μάνα μ’, κλάψον, μανίτσα μου,
κι ευκαίρωσον το ψ̌όπο σ’ 
[γιαβρί μ’, πουλί μ’/νέι]
Αέτσ’ έτον η τύχη μου,
κλάψον για το γιαβρόπο σ’ 
[γιαβρί μ’, πουλί μ’/νέι]

Μάνα μ’, μάνα μ’, μανίτσα μου,
ξάι ’κ’ έσ’νε τυχερέσσα
[γιαβρί μ’, πουλί μ’/γιαρ]
Απόψ’ θα θάφ’νε το γιαβρί σ’,
θ’ απομέντς μαναχέσσα
[γιαβρί μ’, πουλί μ’/γιαρ]