Έταιρον κι η λυγερή

Έταιρον κι η λυγερή
πάν’ όλον τον ποταμόν
Έταιρον επέρνιξεν,
η κόρη ’κ’ επόρεσεν

-Πέρνιξον με -ν-, Έταιρε,
το τσ̌αρκούλι μ’ δίγω σε
-Νέ τσ̌αρκούλιν παίρω σε,
νι͜ά περνήν περνίζω σε
Άλλον τάμαν τάξον με
κι επεκεί περνίζω σε

-Πέρνιξον με -ν-, Έταιρε,
το βραχ̌ι͜άλι μ’ δίγω σε
-Άψιμον να καίει ατο,
ντό να ’φτάγω τ’ άκλερον;
Άλλον τάμαν τάξον με
κι επεκεί περνίζω σε

-Ας σην ψ̌η μ’ κι ανώτερον
όλα τ’ άλλα δίγω σε

Ας σο χ̌έρ’ επέρπαξεν
κι ατέν πέραν έσυρεν