Βάλτε ρακίν

Ρακί σο ποτήρ’ βάλτεν με,
βάλτεν για να μεθύνω
Τα τέρτι͜α ντ’ ετοπλάεψα
απέσ’ ι-μ’ για να σβήνω

Βάλτε ρακίν, βάλτεν κρασί,
φέρ’τεν κι άλλα πουκάλια
Και τα στραβά κι ανάποδα,
παιδία, ελέπω ομάλια

Εμένα μη τερείτε με
δα̤κρόπα αν θα ’κχ̌ύνω
Η καρδι͜ά μ’ πώς βρουλίεται,
το τέρτι μ’ πώς ’α σβήνω;

Βάλτε ρακίν, βάλτεν κρασί,
φέρ’τεν κι άλλα πουκάλια
Και τα στραβά κι ανάποδα,
παιδία, ελέπω ομάλια

Σο κατωθύρ’ εβγάλτε με,
αέραν για να παίρω
’Φουρκίγ̆α, λύεται -ν- η ψ̌η μ’,
παρηγορίαν θέλω

Βάλτε ρακίν, βάλτεν κρασί,
φέρ’τεν κι άλλα πουκάλια
Και τα στραβά κι ανάποδα,
παιδία, ελέπω ομάλια