Το καρδόπο μ’ εχάραξες

Το καρδόπο μ’ εχάραξες,
[Τρυγόνα μ’, τρυγόνα μ’]
και σύρτς απάν’ το άλας
[Ωφ, ωφ, ωφ, αμάν!]
Νερόν να κατενίζ’ α̤το,
[Τρυγόνα μ’, τρυγόνα μ’]
δί’ς μ’ ατο με τα στάλας
[Ωφ, ωφ, ωφ, αμάν!]

Ατσ̌ά πού τρέχ̌’ το ποτάμ’;
Ατσ̌ά πού ρούζ’ το ποράν’;
Η καρδι͜ά μ’ βρουλίεται,
καίεται, μανίεται

Ερώτεσα ’τεν, αδελφέ μ’,
[Τρυγόνα μ’, τρυγόνα μ’]
«ντο έ͜εις σην μέσεν ξένον»
[Ωφ, ωφ, ωφ, αμάν!]
Σκωλέκ’ το ψ̌όπο μ’ τρώει ατο,
[Τρυγόνα μ’, τρυγόνα μ’]
σκωλέκ’ τ’ αφορισμένον
[Ωφ, ωφ, ωφ, αμάν!]

Ατσ̌ά πού τρέχ̌’ το ποτάμ’;
Ατσ̌ά πού ρούζ’ το ποράν’;
Η καρδι͜ά μ’ βρουλίεται,
καίεται, μανίεται

Παίγνι͜α έν’, ρίζα μ’, η εγάπ’,
[Τρυγόνα μ’, τρυγόνα μ’]
παίγνι͜α ντο παίζ’νε δύο
[Ωφ, ωφ, ωφ, αμάν!]
Και αν εχάσα μ’ αραεύ’ς
[Τρυγόνα μ’, τρυγόνα μ’]
την ψ̌η μ’ να παραδίγω
[Ωφ, ωφ, ωφ, αμάν!]

Ατσ̌ά πού τρέχ̌’ το ποτάμ’;
Ατσ̌ά πού ρούζ’ το ποράν’;
Η καρδι͜ά μ’ βρουλίεται,
καίεται, μανίεται