Τα μαλλία μ’ έσπρυναν

Εγώ είπα ’το τη μάνα σ’,
εσύ πέει α’ τον κύρη σ’
Ο κύρη σ’ έν’ καλόκαρδος,
’κι χαλάν’ το χατίρι σ’

Η Ματσουκάτ’σσα η νύφε
τιμά τον πεθερόν ατ’ς
Τα μάγ’λα τ’ς είναι πλουμιστά,
να τρώγω το Θεόν ατ’ς!

♫

Έλα, κάθκα σα γόνατα μ’,
ας πλέκω τα μαλλία σ’
Πλέκ’ ατα ψιλά-ψιλά
και σύρ’ ατα σ’ ωμία σ’

Τούλα, τούλα-λα,
το ταούλ’ και η ζουρνά

Το ταούλ’ και η ζουρνά
παρεβγάλλ’νε μας πουρνά⇋

Τσ̌οπάνος με τα πρόατα
λάσ̌κεται τα γιαζία
Πίνει τα κρύα τα νερά
και σύρ’ τη μαναχ̌ίαν

Τούλα, λέω σε,
τούλα, να λελεύω σε!
Ας ση μάνα σ’ κι ας σον κύρ’ -τ- σ’,
κόρ’, εγώ θα κλέφτω σε (x2)

♫

Τα μαλλία μ’ έσπρυναν
ατό τέρτ’ πα ’κ’ έχ’ α’ εγώ
Με τα μαύρα έρθα εγώ
και με τ’ άσπρα θα πάγω

Που γερά -ν- ας αποθάν’
να μη τυρι͜αννίεται
Όσον ντο γερά και πάει
το κορμίν ατ’ λύεται