Άμον αητέντς σα ψηλά

Άμον αητέντς σα ψηλά
εγώ πώς επέτανα!
Τα λίβι͜α και την αέρα
εγώ πώς ετόξευα!

Αντάρτης έμ’ σα ψηλά,
ση πατρίδας τα ραχ̌ι͜ά
και πώς επολέμανα
με τ’ άγρι͜α τα θερία

Τοι Τούρκ’ς επολέμανα,
αίμαν επότ’σα την γην
Όλια επήγανε χαμένα 
και -ν- εμαύρυνεν η ψ̌η μ’ 

Και για την ελευθερίαν 
εγώ επολέμεσα
Εκουράγαν τα κανάτι͜α μ’
εγώ πώς εγέρασα;

Θεέ μ’, έλα έπαρ’ το ψ̌όπο μ’
εγώ άλλο ’κ’ επορώ
Σα ξένα ξεριζωμένος 
άλλο ’κι θέλω να ζω