Διώχ’νε τον Καραμανλήν

Διώχ’νε τον Καραμανλήν,
Κυβέρνησην θ’ αλλάζ’νε
Τον Παπανδρέου εσέγκανε,
την Ελλάδαν ρημάζ’νε

Ο Παπανδρέου κυβερνά,
Ελλάδα -ν- οπίσ’ πάει
Ο γιος ατ’ επολέμανεν
κουμμουνισμόν να ’φτάει

Ευτάν’ το πραξικόπημαν,
το χρόνον ’κι θυμούμαι
Κερδίζ’νε οι στρατιωτικοί,
αρ’ ατείν’ κυβερνούνε

Παπαδόπουλον, Παττακόν
πάγ’νε για τον Πειραιάν
Γίνεται αντεπανάσταση
διώχ’ν τον Βασιλέαν

Παπαδόπουλον κυβερνά,
Παττακόν σο υπουργείον
Λέγ’νε πολλά εέντανε
και σο Πολυτεχνείο

Κρεμίζ’ν τον Παπαδόπουλον,
Ιωαννίδην βάλλ’νε
Σην Κύπρον οι Αμερικάν’
βάσεις θέλ’νε να βάλ’νε

Ιωαννίδης κυβερνά
και ντ’ επορεί να ’φτάει;
Οι Τούρκ’ εσέβαν σην Κύπρον,
τ’ ημ’σόν η Κύπρος πάει

Μαζεύκουνταν οι στρατηγοί
απόφαση να παίρ’νε
Λέγ’νε «τιδέν ’κι ’ίνεται»,
Καραμανλήν θα φέρ’νε

Έγκανε τον Καραμανλήν
με τ’ άσπρα τα μαλλία
Ατός έτον π’ εσταμάτ’σεν
και τον Τούρκον, παιδία

Τσ’ Αμερικάντς ερώτεσεν
«Ντό είν’ ατά ντ’ ευτάτε;
Σο ΝΑΤΟ όλ’ ανήκομε,
γιατί ’κι βοηθάτε;

Ο Κίσιντζερ εθύμωσεν,
’κι θα υποστηρίζει
Ντό θα ’φτάει κι ο Καραμανλής;
κι ατός πα φοβερίζει

Τα βάσεις όλια επάρ’τεν
και φέρ’τεν σην Τουρκίαν
Εγώ θα φεύω ας σο ΝΑΤΟ
και πάω με τη Γαλλίαν

Ο Κίσιντζερ παίζ’ τη ζουρνάν
και οι Τουρκάντ’ χορεύ’νε
Οι Τούρκ’ ας σον Καραμανλήν
πετρέλαια αραεύ’νε

Οι Τούρκ’ ας σον Καραμανλήν
πετρέλαια ζητούνε
Είπεν ατ’ς το «Μολών λαβέ,
Επάρ’τεν, ας τερούμε!