Θα ’ρχουμαι παίρω σε

Απόψ’ θά ’ρχουμαι παίρω σε
σ’ έναν χορόν να πάμε
Κρυφά, κορτσόπο μ’, ετοιμάχ’,
η μάνα σ’ ’κι αγαπά με

Εγώ για το χατίρ’ τ’ εσόν
την ψ̌η μ’ πα θα ξοδεύω
Έβγα ας σο παράθυρον
τ’ ομμάτι͜α σ’ να λελεύω⇋

Εγώ, πουλόπο μ’ έμορφον,
τ’ εσόν τον λόγον θέλω
Την ώραν πέει με νά ’ρχουμαι
να παίρω σε και φεύω

Εγώ για το χατίρ’ τ’ εσόν
την ψ̌η μ’ πα θα ξοδεύω
Έβγα ας σο παράθυρον
τα μάτι͜α σ’ να λελεύω⇋

Απόψ’, γιαβρί μ’, ’α λέγω σε
η μάνα σ’ ντο φογάται
Κλειδών’ -τ- σε γιατί τ’ εγεινές
τα παλαλά θυμάται

Εγώ για το χατίρ’ τ’ εσόν
την ψ̌η μ’ πα θα ξοδεύω
Έβγα ας σο παράθυρον
τα μάτι͜α σ’ να λελεύω⇋