Θα δίγω σε την καρδι͜ά μ’

Η καρδι͜ά μ’ όντες καλατσ̌εύ’
άκ’σον ατό ντο λέει
Θα εγροικάς πως για τ’ εσέν
μοιρολογά και κλαίει

Δος με τ’ εσά τα χ̌ειλόπα,
το τέρτι μ’ να λαρούται
Θα δίγω σε την καρδι͜ά μου
το τερμάν’ να πλερούται

Σην καρδι͜ά μ’ λίβι͜α κείντανε,
σ’ ομμάτι͜α μ’ σταλαγμίτας
Έρημον έν’ το ψ̌όπο μου
χωρίς εσέν τα νύχτας

Δος με τ’ εσά τα χ̌ειλόπα,
το τέρτι μ’ να λαρούται
Θα δίγω σε την καρδι͜ά μου
το τερμάν’ να πλερούται

Τ’ εμόν η καρδι͜ά και τ’ εσόν,
αρνί μ’, ας ’ίν’νταν έναν
να χ̌αίρουνταν και την εγάπ’
τα καριπλανεμένα

Δος με τ’ εσά τα χ̌ειλόπα,
το τέρτι μ’ να λαρούται
Θα δίγω σε την καρδι͜ά μου
το τερμάν’ να πλερούται