Σ̌ουμπούλα μ’

Έναν σ̌ουμπούλαν αγαπώ,
τ’ όνομαν ατ’ς ’κι λέγω
Την ώραν ντο ’κ’ ελέπ’ ατεν
κάθουμαι κα’ και κλαίγω

Σ̌ουμπούλα μ’, έλα - έλα!
Όντες τερώ σε μη τερείς
αφκακέσ’, χαμογέλα!

Έλα, σ̌ουμπούλα μ’, μετ’ εμέν,
έλα κάθκα σο γιάνι μ’
Εμορφάδα σ’ κανείται σε,
μ’ αλείφκεσαι πογιάν -ι

Σ̌ουμπούλα μ’, έλα - έλα!
Όντες τερώ σε μη τερείς
αφκακέσ’, χαμογέλα!

Έλα, πουλί μ’, έλα, αρνί μ’,
έλα μη τυραννί͜εις με
Τ’ εμόν η ψ̌η ολίγον έν’,
εβγαίν’ κι άλλο ’κ’ ευρήκ’ς με

Σ̌ουμπούλα μ’, έλα - έλα!
Όντες τερώ σε μη τερείς
αφκακέσ’, χαμογέλα!

Ανάθεμα και τα μακρά,
όθεν ’κι πάει λαλία
Τ’ ομμάτι͜α μ’ εσκοτείνεψαν
ας σην αροθυμίαν

Σ̌ουμπούλα μ’, έλα - έλα!
Όντες τερώ σε μη τερείς
αφκακέσ’, χαμογέλα!