Θέλω ν’ αλλάζω τ’ όνεμα μ’

Θέλω ν’ αλλάζω τ’ όνεμα μ’,
το παλαιόν ν’ αφήνω
Γιατί εκείνον αν έχ’ ατο
κι άλλα δάκρυ͜α θα ’κχ̌ύνω

Θ’ απιδι͜αβαίνω τη σεβντάν
και θα καλογερεύω
Να πάω σο Θεόν σιμά
την ψ̌η μ’ να κουρταρεύω

Θέλω να ανασπάλω σε,
ντ’ επόνεσα κανείται
Εγεραλάεψεν η ψ̌η μ’
τον τόπον όθεν κείται

Αρνί μ’, θα ξενιτεύκουμαι
μακρά μέρος θα πάω
Όσον ευρίουμαι σουμά σ’
έναν κακόν θα ’φτάω

Θέλω να ξεριζώνω σε,
σεβντά, ας σην καρδία μ’
Τσ̌άπαν έχασα τον καιρό μ’,
θα χάνω και την υεία μ’