Χαμόμηλον

Και ντ’ έπαθες, χαμόμηλον,
και στέκεις μαρεμένον; [γιαρ]
Γιάμ’ η ρίζα σ’ εδίψασεν;
Γιάμ’ ο καρπό σ’ ελλάεν; [γιαρ]
Γιάμ’ ας σα χαμηλόκλαδα σ’
κανέναν εζαλίεν; [γιαρ]

Νι͜ά η ρίζα μ’ εδίψασεν,
νι͜ά ο καρπό μ’ ελλάεν [γιαρ]
Νι͜ά ας σα χαμηλόκλαδα μ’
κανέναν εζαλίεν [γιαρ]

Έναν κορίτσ’ κι έναν παιδίν
ση ρίζα μ’ εφιλέθαν [γιαρ]
Κι εποίκαν όρκον κι όμνυσμαν
να μη ευτάν’ χωρισίαν [γιαρ]
Ατώρα εχωρίγανε
Γιάμ’ έχω ας σο κρίμαν; [γιαρ]