Είνας παντρεμέντσα

Είνας παντρεμέντσα
έν’ πολλά βαμέντσα
και φορεί μαύρον πανταλόν’
’Κι τερεί το πόιν ατ’ς,
ποίον έν’ το σόι -ν- ατ’ς
και -ν- ευτάει μας τον τρανόν

Άντρας ατ’ς εργάτης
κι ατέ λέει επιστάτης,
ση δουλείαν ξάι ’κι νεγκάσ̌κεται
Άλλος τρώει την ψ̌ην ατ’,
τρώει και τη ζωήν ατ’
και -ν- ατέ φορεί και λάσ̌κεται

Ατείν’ πάντα μαλών’νε,
«τα μωρά ντ’ ’α τρώνε»
λέει ατον «εσύ ξάι ’κι νουνί͜εις»
Ατέ τερεί τα λούσα,
θέλ’ να παίρ’ και κούρσα
κι ατόν λέει «τσιγάρο μη καπνί͜εις»