Τ’ Ανηφορίτ’σσας

Εσκάλωσεν ο λυριτζ̌ής
να παίζ’ τ’ Ανηφορίτ’σσας
Κι ασ’ όλια εμπροστά χορεύ’
το μικρόν τη χ̌ορίτσας

Τ’ Ανηφορίτ’σσας έν’ καλόν
Γαλίαινας χορόν -ι
Χ̌ορίτσα μ’, το κορτσόπο σου
εμέν θα παλαλώνει

Τ’ Ανηφορίτ’σσας χορεύ’νε
κορτσόπα, παλληκάρι͜α
Πιάσκουνταν χ̌έρ’ με το χ̌έρ’
και γίν’ντανε ζευγάρι͜α

Παίζ’ η λύρα, κρούει το ταούλ’
κι ούλ’ εντάμαν χορεύ’νε
Τη κοριτσί’ τ’ ομματόπα
παλληκάρι͜α μαεύ’νε