Δείξον με δρόμον

Δείξον την στράτα σ’ θα ’ρχουμαι
την νύχταν ν’ ανταμούμες
Ομμάτ’ να μη τσαμμώνομεν
ύπνον να μη κοιμούμες

Δείξον την στράτα σ’ θα ’ρχουμαι
του κάκου μ’ αραεύω
Σα ξένα αυλία ’κ’ επορώ
την ψ̌η μ’ να τοπλαεύω

Δείξον με τ’ οσπιτόπο σου
την πόρτα σ’ ας εξέρω
Μεσανυχτί’ θ’ ανοίγ’ ατο
και ντο χρωστείς θα παίρω

Δείξον με το κρεβατόπο σ’,
πουλόπο μ’, χάιτε ας πάμε!
Ανοίξον τ’ εγκαλιόπο σου
να ρούζω απέσ’ και χάμαι