Χορέψτεν, χορέψτεν

Παιδία, εμπάτεν σο χορόν
και -ν- εντάμαν χορέψτεν
Πόνι͜α και τα βάσανα
σ̌κίστεν και τογραέψτεν

Χορέψτεν, παιδία, εσείς χορέψτεν,
εντάμαν τραγωδέστεν
’Σ σα γεράματα κανείς
’κ’ εγλύτωσεν, τερέστεν

Σεις, κορτσόπα -ν-, έμορφα
ντό κάθεστεν τερείτε;
Χορέψτεν για τη ζωήν,
μικρόν έν’ και τελείται

Η κεμεντζ̌έ μόνον εξέρ’
πώς να λαρών’ τα τέρτι͜α σ’
Και το τοξάρ’ όντες κρούει
άψιμον βάλ’ ση χαρά σ’