Τρίχας γεφύρ’

Ση γέφυραν, ση γέφυραν
[Έλα Δάφνε μ’, ποταμέ]
ση Τρίχας το γεφύριν
[Ε! Δάφνε μ’ και μυριγμένε]

Χ̌ίλι͜οι μαστόροι έχτιζαν
[Έλα Δάφνε μ’, ποταμέ]
και μύρι͜οι μαθητάδες
[Ε! Δάφνε μ’ και μυριγμένε]

Όλεν τη μέραν έχτιζαν
[Έλα Δάφνε μ’, ποταμέ]
το βράδον εχαλάουτον
[Ε! Δάφνε μ’ και μυριγμένε]

Ντό δί’ς με Πρωτομάστορα
[Κόρ’ ανάμ’νον, κόρ’ ανάμ’νον]
να στένω το γεφύρι σ’
[Κόρ’, έπαρ’ ύπνον κι ας πάμε]

Αν δίγω σε τη μάνα μου,
[Κόρ’ ανάμ’νον, κόρ’ ανάμ’νον]
άλλεν μανίτσαν ’κ’ έχω
[Κόρ’, έπαρ’ ύπνον κι ας πάμε]

Αν δίγω σε τον κύρη μου,
[Κόρ’ ανάμ’νον, κόρ’ ανάμ’νον]
άλλον κύρην πα ’κ’ έχω
[Κόρ’, έπαρ’ ύπνον κι ας πάμε]

Αν δίγω σε τ’ αδέλφι͜α μου,
[Κόρ’ ανάμ’νον, κόρ’ ανάμ’νον]
άλλον αδέλφι͜α ’κ’ έχω
[Κόρ’, έπαρ’ ύπνον κι ας πάμε]

Αν δίγω σε την κάλη μου,
[Κόρ’ ανάμ’νον, κόρ’ ανάμ’νον]
άλλεν κάλη ευρήκω!
[Κόρ’, έπαρ’ ύπνον κι ας πάμε]