Εσύ φεύ’ς

Πόσα φοράς εμέτρεσα
τ’ άστρα σον ουρανόν -ι; 
Πόσα φοράς εθάρρ’να εγώ,
θα ’ίνεσαι τ’ εμόν -ι;

Εσύ φεύ’ς και πού θα πας;
Τη σεβντά μ’ πώς ’κ’ εγροικάς; 
Εσύ φεύ’ς και πού θα πας;
Το καρδόπο μ’ ’κ’ ερωτάς!

Πόσα ημέρας καίουμαι
για τ’ εσέν το γιαβρόπο μ’; 
Πόσα ημέρας χάν’ντανε;
Έρ’ται κι εβγαίν’ το ψ̌όπο μ’

Εσύ φεύ’ς και πού θα πας;
Τη σεβντά μ’ πώς ’κ’ εγροικάς; 
Εσύ φεύ’ς και πού θα πας;
Το καρδόπο μ’ ’κ’ ερωτάς!

Πόσα δα̤κρόπα εγόμωσαν
τη σεβντάς το λαήνι; 
Πόσα δα̤κρόπα έσυρα
σ’ εγάπ’ς την καμονήν -ι;

Εσύ φεύ’ς και πού θα πας;
Τη σεβντά μ’ πώς ’κ’ εγροικάς; 
Εσύ φεύ’ς και πού θα πας;
Το καρδόπο μ’ ’κ’ ερωτάς!