Γαλέα, πούλτσον τ’ άλογα σ’

Γαλέα¹, πούλτσον τ’ άλογα σ’ [Γαλέα]
κι αράεψον την υεία σ’ 
[’μώ το νόμο σ’/έλα -ν- έλα]
Φοούμαι συ θα ογραεύ’ς [Γαλέα]
καρκίνον σην κοιλία σ’ 
[’μώ το νόμο σ’/έλα -ν- έλα]

Αφήστε ατον να χ̌αίρεται [Γαλέα]
του Γαλέα ο παιδάς-ι 
[’μώ το νόμο σ’]
Πολλά ’κι πάει θα ’ίνεται [Γαλέα]
σο Σεραλάρ² ποπάς-ι 
[’μώ το νόμο σ’/έλα -ν- έλα]

Σα Ούτσ̌ενα³ έν’ μουατσ̌ίρ’ς, [Γαλέα]
σο Σεραλάρ τσ̌οπάνος 
[’μώ το νόμο σ’]
και σ’ έρημον την ξενιτει͜άν [Γαλέα]
ψάλτες και τραγωδι͜άνος, 
[’μώ το νόμο σ’/έλα -ν- έλα]

Η κάτα επήεν σο καρσάν’ [Γαλέα]
αψ̌έστεν τα δαδία 
[’μώ το νόμο σ’]
Εγώ τηνάν εγάπανα [Γαλέα]
εέντον ποπαδία 
[’μώ το νόμο σ’/έλα -ν- έλα]

Αείν’ το πέραν τα ραχ̌ι͜ά [Γαλέα]
ντό έχ’νε και βουίζ’νε; 
[’μώ το νόμο σ’]
Δι͜αβαίν’ ο Χάρον επεκέσ’ [Γαλέα]
κι αποθαμέν’ γογγύζ’νε 
[’μώ το νόμο σ’]