Πολλά να λέγω ’κ’ επορώ

Πολλά να λέγω ’κ’ επορώ
κι ολίγα ’κι κανείνταν [γιαρ, γιαρ]
Τα τέρτι͜α μ’ όλι͜α να λέγω
μερών’ και ’κι τελείνταν [γιαρ, γιαρ]

Σίναν τον πόνο μ’ να λέγω,
την ψ̌η μ’ να ξαλαφρώνω; [γιαρ, γιαρ]
’Σ σα τέρτι͜α, ’ς σα παράπονα
ολίγον να γλυτώνω [γιαρ, γιαρ]

Εγρίβωσαν τα τερτόπα
’τσαντζάρωσαν σ’ ωμία μ’ [γιαρ, γιαρ]
Αέτσ’ θα τυρα̤ννίεται
τ’ άχαρον η καρδία μ’ [γιαρ, γιαρ]

Ν’ αηλί εμέν, μανίτσα μου,
ν’ αηλί εμέν τον μαύρον [γιαρ, γιαρ]
Γουρτάρεψον με, μάνα μου,
θα τρώει με απόψ’ ο Χάρον [γιαρ, γιαρ]