Καρδο̤φόνα

Ε! Φόνα, Φόνα,
κόρ, καρδο̤φόνα
Μενείς και φέρτς με
κι απέσ’ ’κι βάλτς με

Σην πόρτα σ’ έρθα
’παραβραδι͜άστα
Λαλείς και παίρτς με
κι απέσ’ ’κι βάλτς με
Απέσ’ κι αν βάλτς με,
«κάθκα» ’κι λες με
«Κάθκα» κι αν λες με,
σκαμνίν ’κι δί’ς με

Σκαμνίν κι αν δί’ς με,
τραπέζ’ ’κι θέκ’ς με
Τραπέζ’ κι αν θέκ’ς με,
φαΐν ’κι φέρτς με
Φαΐν κι αν φέρτς με,
χουλιάρ’ ’κι φέρτς με

Χουλιάρ’ κι αν φέρτς με,
«για φά’» ’κι λες με
«Για φά’» κι αν λες με,
«μένον» κι λες με
«Μένον» κι αν λες με,
κρεβάτ’ κι στρώντς με

Κρεβάτ’ κι αν στρώντς με,
«κοιμού» κι λες με
«Κοιμού» κι αν λες με,
μονάχον θέκ’ς με
Έλα, μ’ αφήντς με
ση μαναχ̌ίαν
Φίλεμαν έπαρ’,
φίλεμαν δος με