Απάν’ σα παρχαροτόπι͜α

Απάν’ σα παρχαροτόπι͜α [αμάν!]
πρασινοφορεμένα [αμάν! αμάν!]
Αρνόπο μ’, να ευρίγουμ’νε [αμάν!]
εντάμαν μετ’ εσέναν [αμάν! αμάν!]

Εκεί μανάχον θ’ έκουγαμ’ [αμάν!]
τη Θεού τα πουλία [αμάν! αμάν!]
(Κι) Απ’ εσέν λόγι͜α τη εγάπ’ς [αμάν!]
ντ’ έ͜εις απέσ’ σην καρδίαν [αμάν! αμάν!]

Σα τσ̌ικαρόπα μουν θ’ εμπαίν’ [αμάν!]
ο καθαρόν αέρας [αμάν! αμάν!]
Άμον ανθρώπ’ θ’ εζήν’ναμε [αμάν!]
εκεί έπεϊ ημέρας [αμάν! αμάν!]

Ντό να ’φτάμε που ζούμε εμείς [αμάν!]
σο τσ̌όλ’ την πολιτείαν; [αμάν! αμάν!]
Με τόζι͜α και μαυρολίβι͜α, [αμάν!]
ήλιος πα παίρ’ σκοτίαν [αμάν! αμάν!]