Τη καρδι͜άς ι-μ’ η καρδι͜ά

Τα πράσινα τ’ ομματόπα σ’
άφ’ς με για να δεβάζω
[Τη καρδι͜άς ι-μ’ η καρδι͜ά]
άφ’ς με για να δεβάζω
κι ατό την εμορφάδα σου,
τρυγόνα μ’, να θαμάζω
[Τη καρδι͜άς ι-μ’ το γαίμαν]
τρυγόνα μ’ να θαμάζω

Άφ’ς με τα χ̌είλι͜α σ’ να φιλώ,
να παίρω ας σο μέλι σ’
[Τη καρδι͜άς ι-μ’ η καρδι͜ά]
να παίρω ας σο μέλι σ’
Σο γιάνι σ’ ψ̌η μ’ να πορπατώ
και να κρατώ το χ̌έρι σ’
[Τη καρδι͜άς ι-μ’ το γαίμαν]
και να κρατώ το χ̌έρι σ’

Τα ξανθά τα μαλλόπα σου
άφ’ς με ν’ αποτυλίζω
[Τη καρδι͜άς ι-μ’ η καρδι͜ά]
άφ’ς με ν’ αποτυλίζω
Παίρω σε σ’ εγκαλιόπο μου
κι ας ση σεβντά σ’ μεθύζω
[Τη καρδι͜άς ι-μ’ η καρδι͜ά]
κι ας ση σεβντά σ’ μεθύζω

Ψ̌η μ’, άλλο ντο να λέγω σε;
Θέλτς να παρακαλώ σε;
[Τη καρδι͜άς ι-μ’ το γαίμαν]
Θέλτς να παρακαλώ σε;
Γουρπάν’ να ’ίνουμαι εγώ
αν λες με -ν- «αγαπώ σε»
[Τη καρδι͜άς ι-μ’ η καρδι͜ά]
αν λες με -ν- «αγαπώ σε»