Κατηγοράς με, κορτσόπον

Κατηγοράς με, κορτσόπον,
[Ν’ αηλί εμέν!]
φαίνεται ’κι αγαπάς με
[όι, όι/έλα-ν-έλα]
Και μετ’ ατό εσύ ντ’ ευτάς
[Ν’ αηλί εμέν!]
πας κακόν να ευτάς με
[όι, όι/έλα-ν-έλα]

Με τ’ ομματί’ σ’ το τέρεμαν
[Ν’ αηλί εμέν!]
τα δά̤κρυ͜α μ’ κατηβαίν’νε
[όι, όι/έλα-ν-έλα]
Κυλίουνταν σο καρδόπο μ’
[Ν’ αηλί εμέν!]
και το ψ̌όπο μ’ μαραίν’νε
[όι, όι/έλα-ν-έλα]

Νουνίζω και ζαλίουμαι,
[Ν’ αηλί εμέν!]
υπομονή ξάι ’κ’ έχω
[όι, όι/έλα-ν-έλα]
Κι ας σο πονοτυρι͜άννιγμαν
[Ν’ αηλί εμέν!]
εγώ άλλο ’κι αντέχω
[όι, όι/έλα-ν-έλα]

Ντό έχω και ντό έπαθα;
[Ν’ αηλί εμέν!]
Ντό κλαίγω και στενάζω;
[όι, όι/έλα-ν-έλα]
Γιατί σίτ’ καλοκάθουμαι
[Ν’ αηλί εμέν!]
βαρέα αναστενάζω;
[όι, όι/έλα-ν-έλα]