Τασουλίτσα μ’ ντ’ έπαθες

Τασουλίτσα μ’, ντ’ έπαθες,
τον πόνο σ’ σ’ εμέν ’κι λες;
Καρδόπον έχω κι εγώ
για τ’ εσέν ανησυχώ

Ξάι μη βάλτς α’ σο σ̌κοινίν
τη κοσμί’ την καλατσ̌ήν
Εγώ εσέν αγαπώ
για τ’ εσέν καρδοχτυπώ

Άλλα αναμένομε,
άλλα μ’ έρ’τανε σ’ εμάς
Ο κόσμον έν’ ψεύτικος,
θέλ’νε να χωρίζ’νε μας

Τασουλίτσα μ’, μη νουνί͜εις
πάντα έμπρι͜α να τερείς
Τ’ ομματόπα σ’ μη κλαινί͜εις
να χαρεντερί͜εις την ψ̌η σ’

Την ώραν εγώ περ’μένω
πότε ση ζωή σ’ να εμπαίνω
Κι όντες στεφανούμε σε -ν-
θα ζούμε ευτυχισμέν’

Άλλα αναμένομε,
άλλα μ’ έρ’τανε σ’ εμάς
Ο κόσμον έν’ ψεύτικος,
θέλ’νε να χωρίζ’νε μας

Αγαπώ σε, νε Τασούλα
σο καρδόπο μ’ έψ̌ες βρούλαν
Εσύ έ͜εις το γιατρικόν
την γερὰ μ’ ντο θα λαρών’

Εσύ για τ’ εμέν επλάστες,
εγώ είμαι για τ’ εσέν
Όσο ζούμ’ ο εις τον άλλον
καμίαν να μη πικραίν’

Άλλα αναμένομε,
άλλα μ’ έρ’τανε σ’ εμάς
Ο κόσμον έν’ ψεύτικος,
θέλ’νε να χωρίζ’νε μας